Sonte shënohet momenti kulmor i spektaklit më të ndjekur në vend, Big Brother VIP Kosova 4, me finalen e madhe që pritet të mbajë para ekranit mijëra shikues.
Pak orë para nisjes së spektaklit, finalistët kanë ndarë emocionet dhe pritshmëritë e tyre në një intervistë për emisionin “Kosova Today”, duke reflektuar mbi rrugëtimin e gjatë dhe përvojën brenda shtëpisë më të famshme në vend.
Ludo, i pari që foli, u shpreh se ndjen një ndryshim të madh që nga dita e hyrjes në shtëpi. Ai theksoi se kjo eksperiencë e ka bërë të ndihet më mirë dhe më i fortë, ndërsa shtoi se pret një finale interesante dhe plot emocione.
Nga ana tjetër, Hygerta tregoi se po përjeton ndjenja të forta nostalgjie. Sipas saj, ditët e fundit në shtëpi kanë qenë të mbushura me kujtime dhe emocione intensive, të cilat do t’i mbeten gjatë në mendje. Ajo nënvizoi se pavarësisht garës, lidhjet dhe përjetimet brenda shtëpisë janë ato që kanë lënë gjurmë më të thella.
Elijona zbuloi edhe një detaj nga paraqitja e saj për natën finale, duke treguar se do të shfaqet me një veshje në ngjyrë rozë (pink), ndërsa shtoi me humor se nuk do të ndjekë sugjerimin e Londrimit për kombinimin e veshjes.
Ndërkohë, Londrimi u shpreh se po përpiqet të shijojë çdo sekondë të qëndrimit të tij në shtëpi, duke e konsideruar këtë si një nga netët më të rëndësishme dhe më të veçanta të jetës së tij.
Edhe finalisti tjetër, Klodi, tha se emocionet janë të papërshkrueshme dhe se ende nuk po i besohet që po përjeton fundin e një eksperience kaq unike.
Finalja e madhe e BBVK 4 pritet të sjellë surpriza, performanca speciale dhe momente të paharrueshme, ndërsa publiku do të vendosë për fituesin e këtij edicioni. Të gjithë sytë janë sonte te spektakli që ka dominuar vëmendjen e publikut përgjatë gjithë sezonit.
Burimi: https://www.instagram.com/bigbrothervipkosova/
Foto:https://www.instagram.com/bigbrothervipkosova/