Një studim i ri shkencor ka zbuluar se një ndryshim i vetëm në strukturën e ADN-së mund të ketë ndikim të madh në përcaktimin e seksit biologjik, duke sfiduar bindjen e zakonshme se kromozomi Y është faktori vendimtar.
Hulumtimi, i publikuar në revistën Nature Communications dhe i udhëhequr nga shkencëtarja Nitzan Gonen nga Universiteti Bar-Ilan, tregon se një mutacion i vetëm në një rajon specifik të ADN-së mund të përmbysë zhvillimin seksual.
Sipas studimit, tek minjtë me kromozome XX (që zakonisht zhvillohen si femra), një ndryshim i vetëm në një element rregullator të ADN-së ka bërë që ata të zhvillojnë organe riprodhuese mashkullore. Ky rajon i ADN-së, i njohur si Enh13, nuk krijon drejtpërdrejt gjene, por kontrollon aktivizimin e tyre.
Studiuesit theksojnë se ky zbulim është i rëndësishëm, pasi rajone të tilla të ADN-së shpesh nuk analizohen në testet standarde gjenetike, të cilat fokusohen kryesisht tek gjenet që prodhojnë proteina.
“Ky studim tregon se edhe ndryshime shumë të vogla në pjesë të ADN-së që më parë konsideroheshin të parëndësishme mund të kenë ndikime të mëdha në zhvillim dhe sëmundje,” shpjegojnë autorët.
Një tjetër gjetje e rëndësishme është se i njëjti rajon i ADN-së ekziston edhe tek njerëzit, çka hap rrugë për kërkime të mëtejshme mbi çrregullimet e zhvillimit seksual. Aktualisht, rreth një në 4000 foshnje lind me ndryshime në zhvillimin seksual, sipas studiuesve.
Ekspertët theksojnë se ky zbulim nuk e përjashton rolin e kromozomeve X dhe Y, por tregon se procesi i përcaktimit të seksit është më kompleks sesa mendohej më parë dhe ndikohet nga faktorë të shumtë gjenetikë.
Ky studim konsiderohet një hap i rëndësishëm drejt kuptimit më të thellë të biologjisë njerëzore dhe mënyrës se si funksionon ADN-ja jonë.
Burmi; https://www.psychologytoday.com/us/blog/the-new-brain/202604/one-letter-change-in-dna-can-reverse-sex
Foto:Freepik.com