Në kohën e aplikacioneve të takimeve dhe marrëdhënieve moderne, gjithnjë e më shumë njerëz po flasin për të ashtuquajturin “rregulli i 90 ditëve” në dashuri. Ideja është e thjeshtë: të mos krijosh një lidhje serioze apo intimitet të thellë me dikë derisa të kenë kaluar të paktën tre muaj njohje.
Ky “rregull” është bërë viral në rrjetet sociale dhe ka ndezur debate të shumta. Disa besojnë se 90 ditë janë të nevojshme për të kuptuar realisht karakterin e personit që ke përballë, ndërsa të tjerë mendojnë se dashuria nuk mund të funksionojë me afate dhe “teste”.
Sipas psikologëve, megjithatë, ideja e një periudhe njohjeje nuk është aspak pa logjikë.
Ekspertët shpjegojnë se në fazat e para të një lidhjeje, emocionet dhe tërheqja fizike mund të ndikojnë në gjykim. Hormonet e dashurisë shpesh krijojnë një version ideal të personit tjetër dhe mund të bëjnë që të injorohen sinjalet paralajmëruese.
“Shumë njerëz në fillim të njohjes shfaqin versionin më të mirë të vetes. Vetëm me kalimin e kohës dhe në situata të ndryshme kupton realisht si është dikush”, thuhet në analizë.
Pikërisht për këtë arsye, shumë persona zgjedhin të mos nxitojnë me angazhimin emocional apo fizik. Ata besojnë se tre muaj janë të mjaftueshëm për të parë sjelljen e partnerit në momente stresi, konfliktet, mënyrën si trajton të tjerët dhe sa konsistent është në komunikim.
Megjithatë, specialistët paralajmërojnë se nuk ekziston një formulë universale për dashurinë.
“Nuk ka një afat magjik që garanton suksesin e një marrëdhënieje. Disa njerëz krijojnë lidhje të forta shumë shpejt, ndërsa të tjerë kanë nevojë për më shumë kohë”, theksojnë ekspertët.
Sipas tyre, ajo që ka më shumë rëndësi është aftësia për të njohur gradualisht tjetrin pa humbur kufijtë personalë apo pa idealizuar lidhjen në fazat e para.
Në fund, psikologët bien dakord se “rregulli i 90 ditëve” nuk duhet parë si një detyrim, por si një kujtesë për të mos nxituar në dashuri dhe për t’i lënë kohë vetes të kuptojë nëse personi tjetër është vërtet ai që duket në fillim.