Vetëm pak ditë para finales së madhe të “Ferma VIP 3”, gara ka humbur një tjetër konkurrente të fortë. Sara Karaj ka ndërprerë përfundimisht rrugëtimin e saj në reality show, pas vendimit të publikut në televotimin e fundit.
Sara, e cila ishte pjesë e fermës që nga dita e parë, konsiderohej një nga konkurrentet më ambicioze dhe më të vendosura për të arritur deri në fund të garës dhe për të fituar çmimin e madh.
Megjithatë, humbja e dy sfidave vendimtare e çoi atë në një televotim “kokë më kokë” me Ilir Shaqirin. Në fund, ishin votat e publikut që vendosën fatin e garës, duke i dhënë Ilirit mundësinë të vazhdojë rrugëtimin drejt finales, ndërsa Sara u detyrua të largohej vetëm tre ditë para natës së madhe.
Me eliminimin e saj, tashmë janë konfirmuar pesë finalistët e edicionit të tretë të “Ferma VIP”: Moza, Ilir Shaqiri, Soni Malaj, Dj Bujaka dhe Vis Pupa.
Njëri prej tyre do të shpallet fitues i madh i këtij sezoni dhe do të rrëmbejë çmimin kryesor, ndërsa katër finalistët e tjerë do të shpërblehen me nga 10 mijë euro secili.
Finalja e madhe e “Ferma VIP 3” pritet të sjellë emocione të forta dhe surpriza, ndërsa publiku do të vendosë se kush do të kurorëzohet fitues i këtij edicioni.
Burimi; https://www.instagram.com/sara.karaj/
Foto; https://www.instagram.com/sara.karaj/