Jack Depp, djali 24-vjeçar i aktorit të njohur Johnny Depp dhe këngëtares e aktores Vanessa Paradis, po ndjek rrugën e të atit në industrinë e filmit, por këtë herë pas kamerës.
I riu, i cili është vëllai i modeles dhe aktores Lily-Rose Depp, u shfaq rrallë në publik gjatë xhirimeve të filmit të tij të parë artistik në Paris. Me një stil të thjeshtë dhe sportiv, Jack u pa në sheshxhirim me kufje në vesh dhe syze dielli të varura në bluzë, duke drejtuar punën e ekipit.
Sipas E! News, Jack Depp ka realizuar më parë tre filma të shkurtër së bashku me bashkëpunëtorin e tij Dexter Demme. Projekti i tyre më i fundit, “Tug of War”, me protagoniste aktoren Gina Gershon, pati premierën në Festivalin e Filmit në Beverly Hills.
Në një intervistë për Director’s Notes korrikun e kaluar, dy regjisorët zbuluan se po punonin për skenarin e filmit të tyre të parë artistik.
“Meqenëse ky është filmi ynë i tretë i shkurtër, tani po shkruajmë skenarin tonë të parë për një film artistik dhe shpresojmë të nisim përgatitjet dhe xhirimet së shpejti”, ishin shprehur ata.
Përpara se t’i përkushtohej plotësisht kinemasë, Jack Depp punonte në restorantin libanez L’Area në Paris. Pronari i restorantit, Edouard Choueck, e kishte përshkruar atë si “një djalë të shkëlqyer”, duke theksuar se nuk i pëlqen vëmendja mediatike dhe se punonte si banakier, por edhe në kuzhinë.
Edhe vetë Johnny Depp kishte deklaruar më herët se ishte i lehtësuar që djali i tij nuk kishte shprehur dëshirën të bëhej aktor, por duket se Jack ka zgjedhur të ndërtojë karrierën e tij në botën e kinemasë nga prapaskena, si regjisor.