Selena Gomez i ka dhënë fund një kapitulli të rëndësishëm në jetën e saj, duke shitur vilën e saj në Encino, Kaliforni, për 5.4 milionë dollarë.

Këngëtarja dhe aktorja e kishte nxjerrë pronën në treg në maj, me një çmim fillestar prej 6.49 milionë dollarësh. Sipas TMZ, rezidenca përfshin gjashtë dhoma gjumi, 10 banja dhe një sipërfaqe prej rreth 1,068 metrash katrorë.

Gomez e kishte blerë vilën në vitin 2020 për 4.89 milionë dollarë. Prona kishte qenë më parë në pronësi të ikonës së ndjerë të rock-ut, Tom Petty, i cili e shiti atë në vitin 2017, pak muaj para ndarjes së tij nga jeta.

Shtëpia njihet edhe si vendi ku Selena realizoi episodet e emisionit të saj të gatimit, “Selena + Chef”, si dhe disa video me këshilla grimi për markën e saj, Rare Beauty.

Shitja vjen më pak se dy vjet pasi ajo dhe bashkëshorti i saj, producenti Benny Blanco, blenë një rezidencë luksoze në Beverly Hills për 35 milionë dollarë, në dhjetor të vitit 2024.

Në njoftimin e shitjes, vila përshkruhej si një rezidencë private që ndërthur romancën, frymëzimin dhe qetësinë.