Këngëtari dhe ish-banori i “Big Brother VIP Kosova”, Labinot Rexha, ka treguar detaje rreth një incidenti të ndodhur në Rahovec, ku pretendon se është sulmuar fizikisht së bashku me disa anëtarë të familjes.
Në një lidhje telefonike për emisionin “Prive By Liberta Spahiu”, Rexha deklaroi se konflikti lidhet me një mosmarrëveshje pronësore me fqinjët për një sipërfaqe prej 16 metrash katrorë.
Sipas këngëtarit, çështja e ka zanafillën në periudhën para luftës, kur babai i tij i ndjerë dhe pala tjetër kishin lënë një hapësirë që do të shërbente si rrugë e përbashkët. Mosmarrëveshja vijon të trajtohet në rrugë gjyqësore.
Rexha tregoi se incidenti ndodhi në mëngjes, ndërsa po bëhej gati të udhëtonte drejt Prizrenit për të kënduar në një dasmë. Sipas tij, përpjekja për të komunikuar me palën tjetër përfundoi me dhunë fizike dhe fyerje të rënda.
“Duke dalë nga shtëpia, ndërkohë që jemi në proces gjyqësor për një kontest prej 16 metrash katrorë, mora një goditje me grusht. Pati edhe fyerje e sharje shumë të rënda, të cilat nuk i kam përjetuar kurrë më parë”, deklaroi ai.
Artisti pretendoi se gjatë përplasjes nuk u sulmua vetëm ai, por edhe nëna dhe kushërira e tij. Për këtë arsye, ai kërkoi ndërhyrjen e institucioneve dhe trajtimin e rastit nga organet e drejtësisë.
“Nëna ime është sulmuar nga tre burra dhe dy gra. Pres nga prokuroria që personat e përfshirë të mos lirohen, pasi është sulmuar edhe vajza e xhaxhait tim”, u shpreh Rexha.
Deri në këto momente, pala tjetër e përfshirë në konflikt nuk ka reaguar publikisht ndaj pretendimeve të këngëtarit. Për këtë arsye, rrethanat e plota të ngjarjes pritet të sqarohen nga autoritetet kompetente.