Pirja e kafesë menjëherë pas ushqimit është një zakon i përhapur për shumë njerëz, por ekspertët e shëndetit paralajmërojnë se kjo praktikë mund të ndikojë negativisht në përthithjen e hekurit nga organizmi.
Sipas studimeve, si kafeja ashtu edhe çaji i zi përmbajnë tanine, përbërës natyralë që lidhen me hekurin gjatë tretjes dhe e bëjnë më të vështirë absorbimin e tij. Ky efekt është veçanërisht i theksuar për hekurin jo-hemik, i cili gjendet kryesisht në ushqime me bazë bimore si drithërat, bishtajoret dhe perimet jeshile.
Ndikimi në shëndet
Të dhënat tregojnë se konsumimi i kafesë gjatë ose menjëherë pas vakteve mund të ulë ndjeshëm sasinë e hekurit që përthithet nga trupi. Në disa raste, kjo mund të çojë në nivele të pamjaftueshme të hekurit në gjak, duke rritur rrezikun për probleme si lodhja apo anemia, sidomos te personat që tashmë kanë mungesë të këtij minerali.
Ekspertët theksojnë se jo vetëm kafeja, por edhe produktet e pasura me kalcium – si qumështi dhe nënproduktet e tij – mund të ndërhyjnë në përthithjen e hekurit, pasi këto dy elemente “konkurrojnë” gjatë absorbimit në organizëm.
Rekomandimi i specialistëve
Për të shmangur këto efekte, rekomandohet që kafeja, çaji dhe produktet e pasura me kalcium të konsumohen të paktën 1 deri në 2 orë larg vakteve kryesore.
Kjo praktikë ndihmon në përthithjen më efikase të hekurit dhe në ruajtjen e një ekuilibri të shëndetshëm ushqyes në organizëm.