Këngëtari i njohur britanik, Zayn Malik, ka thyer heshtjen pas polemikave që shpërthyen në rrjetet sociale lidhur me një video virale ku ai shihej në një debat të tensionuar jashtë një hoteli. Pamjet, të cilat u përhapën me shpejtësi në internet, ngritën akuza se ish-anëtari i grupit “One Direction” ishte sjellë në mënyrë të papërshtatshme ndaj fansave.
Në videon e publikuar nga mediat ndërkombëtare, Zayn dëgjohej duke u thënë disa personave “largohuni nga rruga ime”, ndërsa ai dhe një pjesëtar i ekipit të sigurisë përpiqeshin të hipnin në automjetin e tyre mes një turme njerëzish të mbledhur pranë hyrjes së hotelit.
Pas reagimeve të shumta online, artisti vendosi të sqarojë situatën përmes një komenti në rrjetet sociale, duke mohuar kategorikisht se kishte konflikt me fansat e tij.
“Fansat e mi janë gjithmonë të respektueshëm dhe fantastikë. Problemi ishte me disa burra të rritur që po na pengonin të largoheshim për rreth 10 minuta”, u shpreh Zayn.
Deklarata e tij ka ndarë opinionin publik: disa përdorues e mbështetën këngëtarin duke theksuar presionin dhe mungesën e privatësisë me të cilën përballen figurat publike, ndërsa të tjerë kritikuan mënyrën se si ai reagoi në momentin e tensionuar.
Ngjarja vjen në një periudhë kur çdo lëvizje e artistëve monitorohet nga fansat dhe mediat sociale, duke bërë që situata të tilla të marrin vëmendje të menjëhershme globale.