Këngëtarja dhe modelja Cassie Ventura duket se ka mbyllur një kapitull të rëndësishëm të jetës së saj, duke zgjedhur të ndërtojë një të ardhme larg Shteteve të Bashkuara.
Sipas dokumenteve gjyqësore të siguruara nga media amerikane In Touch Weekly, Ventura ka deklaruar se tashmë jeton jashtë SHBA-së dhe nuk ka plane për t’u rikthyer. Deklarata është paraqitur më 1 maj në kuadër të një padie civile që vazhdon kundër Clayton Howard.
Në dokumentet e dorëzuara në gjykatë, Cassie shprehet qartë se banon jashtë territorit amerikan, megjithëse nuk ka zbuluar se në cilin shtet është vendosur apo kur ka marrë vendimin për t’u larguar.
Lajmi vjen rreth një vit pas dëshmisë së saj në procesin penal kundër ish-partnerit Sean Combs, i njohur si Diddy. Gjatë seancave gjyqësore, Ventura foli për abuzimet që pretendon se ka përjetuar gjatë marrëdhënies së tyre, e cila zgjati nga viti 2007 deri në vitin 2018.
Në vitin 2023, ajo ngriti një padi ndaj reperit dhe producentit të njohur, duke e akuzuar për përdhunim, dhunë fizike dhe detyrim për të kryer akte seksuale. Çështja u mbyll me një marrëveshje financiare, ndërsa Cassie ka deklaruar se ka marrë 20 milionë dollarë nga Combs dhe kompanitë e tij.
Vendimi i saj për të nisur një jetë të re jashtë SHBA-së po shihet nga shumë media si një përpjekje për të lënë pas periudhën e vështirë që ka përjetuar dhe për t’u fokusuar te familja dhe projektet personale.