Më 1 korrik, Princesha Diana do të kishte festuar 65-vjetorin e lindjes. Me këtë rast, ish-shërbëtori i saj besnik, Paul Burrell, ka ndarë kujtime dhe rrëfime për anën më pak të njohur të ikonës mbretërore, duke thënë se ajo është keqinterpretuar ndër vite.
Në një intervistë për Marie Claire, Burrell, i cili shërbeu pranë Dianës deri në ditën e fundit të jetës së saj, tha se njerëzit nuk e kanë kuptuar plotësisht misionin që ajo kishte.
“Mendoj se princesha, në ditët e sotme, po paraqitet në mënyrë të gabuar, po keqinterpretohet dhe po keqkuptohet, sepse gjithçka që ajo donte ishte të ishte një humanitare”, u shpreh ai.
Sipas Burrell, Diana dëshironte të udhëtonte nëpër botë për të ndihmuar njerëzit në nevojë dhe për t’u dhënë zë atyre që ishin lënë në harresë.
“Ajo mund të kishte qëndruar në një pallat, të kishte veshur rroba dhe bizhuteri të mrekullueshme dhe të mos bënte asgjë. Por nuk e bëri këtë. Ajo përdori famën dhe profilin e saj publik për të ndihmuar të tjerët”, shtoi ai.
Princesha Diana humbi jetën tragjikisht më 31 gusht 1997, në moshën 36-vjeçare, në një aksident automobilistik në Paris, ku humbi jetën edhe partneri i saj i atëhershëm, Dodi Fayed.
Megjithatë, Burrell zbuloi se, sipas tij, kirurgu i zemrës Hasnat Khan ishte dashuria e vërtetë e Dianës.
Ai tregoi se marrëdhënia mes tyre zgjati nga viti 1995 deri në korrik 1997 dhe se kishte ndihmuar princeshën ta mbante të fshehtë këtë histori dashurie për dy vite.
“Hasnat Khan ishte dashuria e jetës së saj. E ndihmova ta mbante të fshehtë këtë histori dashurie për dy vjet, pa e ditur askush”, tha Burrell.
Edhe pas gati tre dekadash nga vdekja e saj, Princesha Diana vijon të mbetet një nga figurat më të dashura dhe më të kujtuara të familjes mbretërore britanike, ndërsa trashëgimia e saj humanitare vazhdon të frymëzojë miliona njerëz në mbarë botën.
Burimi;https://www.youtube.com/watch?v=843QNc6wY6I&t=261s
Foto; https://www.youtube.com/watch?v=843QNc6wY6I&t=261s