Të gjithëve na ndodh që shumë here të ham pa qenë në të vërtetë të uritur. Kjo ndodh veçanarisht kur jemi sidomos të stresuar. Ky fenomen njihet ndryshe si “ushqimi emocional”.
Ekspertët shpjegojnë se ushqimi emocional është tendenca për të ngrënë jo për shkak të urisë fizike, por për të përballuar emocionet. Pra, ushqimi përdoret si një mënyrë për të qetësuar stresin, për të shpërqendruar mendjen apo për të përmirësuar humorin.
Një nga arsyet kryesore pse ndodh kjo lidhet me mënyrën se si reagon trupi ndaj stresit. Kur jemi të stresuar, organizmi prodhon hormonin kortizol, i cili rrit oreksin dhe krijon dëshirë për ushqime të pasura me sheqer, yndyrë apo kripë të ashtuquajturat “comfort food”. Këto ushqime japin një ndjesi të menjëhershme kënaqësie dhe energjie, duke na bërë të ndihemi përkohësisht më mirë.
Por kjo ndjesi është e përkohshme. Në shumë raste, pasi hamë për arsye emocionale, mund të ndiejmë faj apo zhgënjim, duke krijuar një cikël të vazhdueshëm mes stresit dhe ushqimit.
Faktorë të tjerë që ndikojnë janë edhe mërzia, vetmia, ankthi apo lodhja. Në këto situata, ushqimi shndërrohet në një “ngushëllim” të shpejtë, pasi aktivizon zonat e trurit që lidhen me kënaqësinë dhe shpërblimin.
Ka shumë njerëz që kanë shtuar shumë peshë nga ky fenomen, aryeja është sepse hanë pa kontroll edhe duke parë tv.
Megjithatë, ekspertët theksojnë se ushqimi emocional është një reagim normal dhe njerëzor. Problemi lind kur ai bëhet mënyra kryesore për të përballuar emocionet, pasi mund të ndikojë në shëndetin fizik dhe mendor në afatgjatë.
Për këtë arsye, rekomandohet që të identifikohen momentet kur hamë nga emocionet dhe të kërkohen mënyra alternative për të menaxhuar stresin, si aktiviteti fizik, bisedat me të afërmit apo teknikat e relaksimit.
Burimi:
https://www.healthline.com/health/emotional-eating
Foto: Freepik.com