Një studim i ri sugjeron se jo vetëm ajo që hamë, por edhe koha kur konsumojmë mëngjesin mund të ndikojë në shëndetin dhe jetëgjatësinë tonë, veçanërisht me kalimin e viteve.
Hulumtimi u realizua nga shkencëtarë të Spitalit të Përgjithshëm të Masaçusetsit (Massachusetts General Hospital) dhe Universitetit të Mançesterit, të cilët analizuan zakonet ushqimore dhe shëndetin e rreth 3 mijë personave të moshës 42 deri në 94 vjeç për më shumë se dy dekada. Studiuesit ndoqën oraret e vakteve, stilin e jetesës, faktorët gjenetikë dhe rezultatet shëndetësore për të kuptuar lidhjen mes kohës së ushqimit dhe shëndetit në afat të gjatë.
Rezultatet treguan se me kalimin e moshës shumë njerëz kanë tendencë t’i shtyjnë vaktet më vonë gjatë ditës, ndërsa intervali kohor gjatë të cilit konsumohen të gjitha vaktet bëhet më i shkurtër. Një nga gjetjet më të rëndësishme ishte se ngrënia e mëngjesit më vonë lidhej me një rrezik më të lartë për probleme shëndetësore dhe vdekshmëri në të ardhmen.
Sipas të dhënave të studimit, personat që hanin mëngjes më herët kishin një normë mbijetese rreth 89.5% gjatë një periudhe 10-vjeçare, ndërsa tek ata që e konsumonin më vonë kjo shifër ishte rreth 86.7%. Studiuesit zbuluan gjithashtu se çdo orë shtesë vonesë në mëngjes lidhej me një rritje prej 8–11% të rrezikut të vdekjes, megjithëse kjo nuk do të thotë se ngrënia e vonë është domosdoshmërisht shkaku i drejtpërdrejtë.
Ekspertët theksojnë se ky është një studim vëzhgues, prandaj nuk provon shkak-pasojë. Ngrënia e vonë e mëngjesit mund të jetë edhe një tregues i problemeve të tjera si gjumi i dobët, depresioni, lodhja apo vështirësitë në përgatitjen e ushqimit.
Megjithatë, studiuesit sugjerojnë se mbajtja e një rutine të qëndrueshme ushqimore dhe konsumimi i mëngjesit relativisht herët mund të ndihmojë në ruajtjen e ritmeve natyrore të trupit dhe në mbështetjen e një stili jetese më të shëndetshëm.