Apeli ndryshon masën e sigurisë për Jozefin Markun, nga “arrest në shtëpi” në “detyrim paraqitje”

Gjykata e Apelit ka ndryshuar masën e sigurisë ndaj këngëtarit Jozefin Marku, duke zëvendësuar “arrestin në shtëpi” me “detyrim paraqitje”, sipas raportimit të Kryefjala.

Marku ishte arrestuar më 5 shtator, në kuadër të hetimeve për një ngjarje ku dyshohet se, së bashku me persona të tjerë, ka dhunuar Eduard Kuçin pranë mbikalimit të Rinasit.

Fillimisht, Prokuroria kishte kërkuar caktimin e masës “arrest me burg”. Gjykata e Tiranës vendosi më 9 shtator masën “arrest në shtëpi”, e cila tashmë është ndryshuar nga Apeli.

Ngjarja mori vëmendje publike pas qarkullimit në rrjetet sociale të pamjeve të filmuara pranë mbikalimit të Rinasit. Sipas Policisë, Marku dhe persona të tjerë dyshohet se ndaluan dhe dhunuan Kuçin, me pretendimin se ai kishte fyer njërin prej tyre.

Në kuadër të hetimeve është verifikuar edhe përdorimi i dyshuar pa të drejtë i elementeve dhe simboleve të Policisë së Shtetit.

Në njoftimin e bërë në momentin e ndalimit, Policia bëri të ditur se Marku dyshohej për veprat penale “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja e padrejtë në jetën private”.

Hetimet për çështjen vijojnë. Ndryshimi i masës së sigurisë nuk përbën vendim mbi fajësinë e tij; Marku prezumohet i pafajshëm deri në një vendim gjyqësor të formës së prerë.