Reperi i njohur amerikan Offset ka përfunduar në spital pasi u qëllua me armë zjarri jashtë një kazinoje në Florida. Sipas burimeve zyrtare, ai ndodhet në gjendje të qëndrueshme dhe po merr trajtim mjekësor nën monitorim të vazhdueshëm.
Ngjarja ndodhi në zonën e shërbimit “drive-thru” jashtë hotelit dhe kazinosë Seminole Hard Rock. Lajmi është konfirmuar nga zëdhënësi i artistit, i cili bëri të ditur se reperi, emri i vërtetë i të cilit është Kiari Kendrell Cephus, po ndiqet nga mjekët dhe është jashtë rrezikut për jetën.
Ende nuk dihen detajet e plota mbi rrethanat që çuan në të shtënat. Policia e Seminole ka njoftuar se dy persona janë ndaluar dhe hetimet për zbardhjen e ngjarjes janë në vijim. Autoritetet kanë siguruar se situata është nën kontroll dhe nuk paraqet rrezik për publikun, ndërsa aktiviteti në zonë vijon normalisht.
Ky incident rikthen në vëmendje një tjetër ngjarje tragjike që lidhet me grupin Migos. Në vitin 2022, Takeoff, një tjetër anëtar i grupit dhe i afërm i Offset, humbi jetën pasi u qëllua me armë zjarri në Houston. Çështja vijon ende në proces gjyqësor.
Offset u bë i njohur si pjesë e treshes së famshme të hip-hopit Migos, e cila shpërtheu në skenën muzikore me hitin “Versace” në vitin 2013. Më pas, grupi arriti sukses të madh ndërkombëtar me projekte si albumi “Culture” dhe këngë hit si “Bad and Boujee”, “MotorSport” dhe “Walk It Talk It”.
Në jetën personale, Offset ka qenë i martuar me reperen Cardi B që nga viti 2017, ndërsa në vitin 2024 ajo konfirmoi se kishte paraqitur kërkesë për divorc.
Ndërkohë, fansat dhe kolegët e tij kanë reaguar në rrjete sociale, duke i uruar shërim të shpejtë artistit pas këtij incidenti të rëndë.
Burimi: https://www.cbsnews.com/atlanta/news/offset-shot-in-south-florida-near-hard-rock-casino-atlanta-rapper-hospitalized-stable
Foto: https://www.instagram.com/offsetyrn/?hl=en