Dua Lipa ka emocionuar fansat në mbarë botën me një njoftim surprizë, duke zbuluar se shumë shpejt do të publikojë një film koncerti dhe një album live nga turneu i saj i suksesshëm. Këngëtarja me origjinë shqiptare ndau lajmin përmes rrjeteve sociale, ku publikoi një video paralajmëruese që u prit me entuziazëm të madh nga ndjekësit.
Artistja konfirmoi se filmi koncert “Live From Mexico” do të publikohet më 21 maj në orën 18:00 (BST) në platformën YouTube, ndërsa albumi live do të lançohet një ditë më vonë, më 22 maj. Në mesazhin e saj emocionues, Dua Lipa shkroi:
“LIVE FROM MEXICOOOO!!! Filmi i plotë i turneut del më 21 maj… dhe albumi live del më 22 maj!!! Tani mund t’i shijojmë këto shfaqje përgjithmonë e përgjithmonë, ju dua!!!!”
Një nga surprizat që u prit më së miri nga publiku ishte fakti se filmi i koncertit do të jetë i disponueshëm falas në YouTube. Kjo u jep mundësinë miliona fansave në të gjithë botën që të përjetojnë atmosferën e koncerteve, edhe nëse nuk kanë pasur mundësi të ndjekin turneun nga afër.
Menjëherë pas njoftimit, rrjetet sociale u mbushën me reagime pozitive. Fansat e falënderuan artisten për “dhuratën” speciale, ndërsa shumë prej tyre shprehën emocionet për mundësinë për të rijetuar koncertet e saj.
“Faleminderit mbretëreshë!”, shkroi një fans, ndërsa një tjetër komentoi: “Nuk munda të jem në koncert, por tani do të ndihem sikur jam aty”.
Për shumë ndjekës, publikimi i filmit dhe albumit live konsiderohet si një moment i rëndësishëm në karrierën e Dua Lipës dhe një mënyrë perfekte për të përmbyllur një periudhë shumë të suksesshme artistike. Performancat e saj energjike, atmosfera elektrizuese dhe lidhja e fortë me publikun pritet të reflektohen fuqishëm në këtë projekt të ri.
Me këtë hap, Dua Lipa vazhdon të dëshmojë pse mbetet një nga emrat më të mëdhenj të muzikës pop ndërkombëtare dhe një nga artistet më të dashura të momentit.
Burimi;https://www.instagram.com/dualipa/