Dua Lipa dhe Callum Turner shijojnë muajin e mjaltit në Itali, pas dasmës luksoze prej 1.7 milionë eurosh

Dua Lipa dhe bashkëshorti i saj, aktori britanik Callum Turner, po shijojnë ditët e para si çift i martuar në një nga destinacionet më luksoze të Italisë, pas dasmës së tyre madhështore që raportohet të ketë kushtuar rreth 1.7 milionë euro.

Të sapomartuarit janë parë në hotelin prestigjioz San Domenico Palace në Taormina, një nga resortet më të njohura në Siçili, i famshëm edhe si vendxhirimi i sezonit të dytë të serialit hit “The White Lotus”.

Çifti u fotografua duke shëtitur dorë për dore nëpër rrugët piktoreske të qytetit, ndërsa shijonin atmosferën romantike të bregdetit italian. Hoteli luksoz, i vendosur mbi shkëmbinj me pamje spektakolare nga Mali Etna dhe Deti Jon, konsiderohet një nga destinacionet më ekskluzive në Itali.

Dua dhe Callum mbërritën në Taormina pasi kurorëzuan dashurinë e tyre në Palermo, në një ceremoni disa ditore që mblodhi emra të njohur të industrisë së muzikës dhe kinemasë. Mes të ftuarve raportohet se ishin Charli XCX, Elton John dhe Mark Ronson.

Sipas mediave ndërkombëtare, Elton John ka performuar gjatë ceremonisë, duke i dhënë një prekje edhe më të veçantë momentit kur çifti shkëmbeu betimet martesore.

Qëndrimi i tyre në San Domenico Palace përkon edhe me nisjen e klubit veror të leximit të hotelit, i cili këtë vit është frymëzuar nga rekomandimet letrare të platformës së Duas, Service95. Kjo nuk është rastësi, pasi si Dua ashtu edhe Callum njihen për pasionin e tyre të madh ndaj letërsisë.

Madje, sipas burimeve pranë çiftit, në dasmën e tyre ishte krijuar edhe një bibliotekë simbolike, e dedikuar dashurisë së tyre të përbashkët për librat.

Gjatë shëtitjeve në Taormina, këngëtarja 30-vjeçare u pa me një stil të thjeshtë dhe elegant, e veshur me pantallona të zeza dhe flokët e kapura bisht, ndërsa çifti shoqërohej në mënyrë diskrete nga një truprojë. Ata nuk hezituan të ndaleshin për të realizuar fotografi me disa fansa që i njohën në qytet.

Muaji i mjaltit i Duas dhe Callumit po zhvillohet në një atmosferë romantike dhe luksoze, duke kurorëzuar një nga historitë më të komentuara të showbizit ndërkombëtar këtë vit.