Në një tryezë të rrumbullakët të “Aspire”, tre nga emrat më të respektuar në industrinë e bukurisë, Danessa Myricks, Dianna Cohen dhe Amy Liu, kanë ndarë përvojat e tyre mbi ndërtimin dhe zgjerimin e markave që kanë fituar besimin e konsumatorëve.

Në bisedë morën pjesë Danessa Myricks, themeluese e “Danessa Myricks Beauty”, Dianna Cohen, krijuesja e “Crown Affair”, si dhe Amy Liu, themeluese e “Tower 28”. Ato folën hapur për sfidat e krijimit të një biznesi në një treg ku hapja e një marke të re është bërë më e lehtë se më parë, por mbijetesa dhe rritja afatgjatë janë gjithnjë e më të vështira.

Amy Liu solli si shembull suksesin e “Tower 28”, e lançuar në vitin 2019, e cila sot raportohet se ka arritur një vlerësim prej rreth 228 milionë dollarësh. Ndërkohë, “Crown Affair”, e krijuar në vitin 2020, është zgjeruar nga rreth 55 pika shitjeje në Sephora drejt dyqaneve në SHBA dhe Kanada, ndërsa shampoja e saj e thatë është renditur e para në kategorinë përkatëse.

Edhe “Danessa Myricks Beauty” ka ndërtuar një rrugëtim të qëndrueshëm, duke qenë fitimprurëse që prej fillimit. Marka arriti të krijojë rreth 500 produkte përpara se të hynte në rrjetin e Sephora.

Gjatë diskutimit, themelueset ndanë këndvështrimet e tyre mbi mënyrën se si një markë hyn dhe qëndron në Sephora, dilemat mes sigurimit të investimeve dhe vetëfinancimit, si edhe rëndësinë e krijimit të një komuniteti të vërtetë me konsumatorët.

Sipas tyre, suksesi nuk lidhet vetëm me një produkt tërheqës apo me praninë në rrjetet sociale, por me ndërtimin e një identiteti të besueshëm, dëgjimin e komunitetit dhe aftësinë për të ruajtur vlerat e markës edhe gjatë zgjerimit të saj.