Adrian Hila dëshmon në polici: Kamerat i vendosa për siguri, jo për të filmuar momente intime

Kompozitori Adrian Hila ka dhënë për rreth tre orë sqarime para Policisë së Tiranës lidhur me videot nga ambientet e tij private që janë publikuar në internet. Sipas raportimit të Top Channel, pas marrjes në pyetje ai është lënë i lirë, ndërsa po hetohet për veprën penale “Ndërhyrje të padrejta në jetën private”.

Në dëshminë e tij, Hila ka deklaruar se kamerat janë instaluar në vitin 2022 për arsye sigurie. Sipas tij, në zonë kishin ndodhur vjedhje të pazbardhura, ndërsa në zyrën e tij ishte zhdukur një send me vlerë modeste. Këto ngjarje, ka shpjeguar kompozitori, e shtynë të vendoste kamera brenda dhe jashtë ambienteve.

Ai ka mohuar që qëllimi i instalimit të tyre të ketë qenë regjistrimi i momenteve intime.

Sipas të njëjtit raportim, nga deklarimet dhe kontrollet e policisë ka rezultuar se kamerat ishin të dukshme. Pajisja e vendosur në dhomën e gjumit përshkruhet si kamerë me sensorë.

I pyetur për këndin e filmimit, Hila ka deklaruar se pozicionin e kishte përcaktuar kompania që kreu montimin, për të mundësuar lidhjen më të lehtë me burimin e energjisë.

Ndërkohë, policia po heton edhe mënyrën se si materialet kanë përfunduar në internet. Kompozitori ka ngritur dyshime se sistemi mund të jetë hakeruar, por kjo mbetet për t’u verifikuar nga hetimet.

Top Channel raporton se hetimet përfshijnë edhe dyshime për përgjim të paligjshëm, ndërhyrje në të dhënat kompjuterike dhe keqpërdorim të pajisjeve.

Policia ka kontaktuar gjithashtu gratë dhe vajzat e identifikuara në materialet e publikuara. Sipas raportimit, ato kanë deklaruar se nuk kanë qenë në dijeni që po filmoheshin dhe kanë shprehur gatishmërinë për të bashkëpunuar me hetuesit

Burimi: https://top-channel.tv/2026/10/02/adrian-hila-d