Përdhunim dhe trafikim njerëzor, rëndojnë akuzat për Andrew Tate
Personazhi i rrjetit Andrew Tate akuzohet për përdhunim dhe trafikim njerëzor në Rumani.
Ai gjithashtu akuzohet për formim të një bande kriminale për shfrytëzimin e grave.
Prokurorët ngritën gjithashtu akuza kundër vëllait të Tate, Tristanit, dhe dy grave rumune në një gjykatë në Bukuresht, kryeqyteti i Rumanisë, tha agjencia e vendit kundër krimit të organizuar.
Në një deklaratë, Drejtoria për Hetimin e Krimit të Organizuar dhe Terrorizmit pretendoi se katër të pandehurit formuan një grup kriminal në vitin 2021 “për të kryer krimin e trafikimit të qenieve njerëzore” në Rumani, si dhe në Shtetet e Bashkuara dhe Britani.
Agjencia pretendoi se shtatë viktima femra u mashtruan dhe u transportuan në Rumani, ku u shfrytëzuan seksualisht dhe iu nënshtruan dhunës nga banda. Një i pandehur akuzohet se ka përdhunuar dy herë një grua në mars të vitit 2022, sipas deklaratës.
Tate, 36 vjeç, ka banuar në Rumani që nga viti 2017. Ish-kikboksieri profesionist ka pretenduar vazhdimisht se prokurorët rumunë nuk kanë prova dhe se çështja është një komplot politik i krijuar për t’i mbyllur gojën.
Burimi i fotos: https://www.instagram.com/___andrew___tate____/