Një situatë e tensionuar ka përfshirë spektaklin “Ferma VIP”, ku një debat i fortë mes Sarës dhe Mozës ka degraduar në përplasje personale dhe emocione të forta.
Gjithçka nisi gjatë një momenti pune në fermë, kur Moza iu drejtua Sarës me një koment që u interpretua si fyes: “Ik në kopsht bashkë me fëmijët e tu”. Kjo deklaratë e preku Sarën, e cila reagoi menjëherë duke shpërthyer në lot dhe duke e cilësuar gjuhën e përdorur si të papranueshme.
Debati u përshkallëzua më tej me akuza të ndërsjella. Sara e quajti Mozën “manipuluese” dhe kërkoi një ndjesë publike, ndërsa Moza ia ktheu me të njëjtin epitet, duke mohuar se kishte për qëllim të ofendonte fëmijët e saj. Ajo sqaroi se komenti kishte të bënte me sjelljen që e konsideronte “fëminore” të Sarës, duke shtuar se nuk kishte asnjë qëllim të përfshinte familjen.
Në debat u përfshi edhe Ermali, i cili shprehu keqardhje për mënyrën si po zhvillohej situata, duke theksuar se nuk është e hijshme që konflikte të tilla të përfshijnë edhe fëmijët. Nga ana tjetër, Sara reagoi ashpër duke kundërshtuar çdo përmendje të familjes së saj dhe duke i kërkuar Mozës të mos i përmendë më fëmijët.
Tensionet nuk u ndalën me kaq. Në një tjetër diskutim brenda fermës, Sara në rolin e kryefermeres ka ndarë detyrat mes konkurrenteve, por kjo ka sjellë pakënaqësi. Malbora ka kundërshtuar hapur ndarjen e punëve, duke pretenduar se prej javësh i janë caktuar vetëm detyra shtëpiake dhe nuk i është dhënë mundësia të merret me kafshët.
Situata mbetet e ndezur brenda fermës, ndërsa marrëdhëniet mes konkurrenteve duket se po tensionohen gjithnjë e më shumë.
