Moderatori i njohur amerikan Jimmy Kimmel ka reaguar për herë të parë publikisht pas polemikave të forta që shpërthyen për një shaka të tij në lidhje me Zonjën e Parë, Melania Trump.
Gjatë emisionit të tij “Jimmy Kimmel Live!”, të transmetuar më 27 prill, Kimmel sqaroi se komenti i bërë më 23 prill ishte thjesht një “shaka e lehtë” dhe nuk kishte për qëllim të nxiste urrejtje apo dhunë, siç u interpretua nga disa zyrtarë të Shtëpisë së Bardhë dhe nga vetë Melania Trump.
Megjithatë, ai theksoi se nuk ka kërkuar falje për përmbajtjen e shakasë, duke mbrojtur qëndrimin e tij.
Në monologun e tij, Kimmel u ndal edhe te incidenti i ndodhur gjatë darkës së Korrespondentëve në Shtëpinë e Bardhë, ku një situatë me armë zjarri shkaktoi panik mes të pranishmëve. Ai shprehu keqardhje për atë që e cilësoi si një përvojë traumatike, pavarësisht se nuk pati viktima.
“Jam i keqardhur që ju dhe të gjithë në atë sallë kaluat një situatë të tillë,” u shpreh ai, duke nënvizuar se një shaka e bërë disa ditë më parë nuk mund të lidhet me ngjarje kaq serioze.
Reagimi i tij vjen pasi Melania Trump dhe presidenti Donald Trump e kritikuan ashpër, duke i cilësuar deklaratat si të papërshtatshme. Presidenti madje kërkoi publikisht largimin e Kimmel nga televizioni.
Nga ana tjetër, moderatori theksoi se ka qenë gjithmonë kundër dhunës me armë dhe se komentet e tij janë keqinterpretuar.
Pavarësisht debatit, emisioni “Jimmy Kimmel Live!” vijon të transmetohet çdo mbrëmje në rrjetin ABC.
Burimi; https://www.instagram.com/jimmykimmellive/?hl=en
Foto;https://www.instagram.com/jimmykimmellive/?hl=en