Arbër Hajdari ka qenë i ftuar në emisionin “Goca dhe Gra”, ku ka ndarë disa detaje interesante nga eksperienca e tij si opinionist në “Big Brother VIP Albania”, një nga formatet më të ndjekura në vend.
Gjatë intervistës, ai është ndalur te marrëdhëniet dhe bashkëpunimi me opinionistet ndër vite, duke u përballur me një pyetje direkte mbi zgjedhjen e tij mes kolegeve me të cilat ka ndarë panelin në edicione të ndryshme.
Pa hezitim, Hajdari ka veçuar Monika Kryemadhin si opinionisten që vlerëson më shumë. Ai theksoi se ajo spikat për natyrën e saj të drejtpërdrejtë dhe për faktin që shpreh gjithmonë mendimet pa komplekse.
Sipas tij, një nga arsyet kryesore që e bën të veçantë bashkëpunimin me Kryemadhin është qetësia dhe mungesa e konflikteve të zgjatura mes tyre, duke lënë të kuptohet se raporti profesional ka qenë i balancuar dhe pa tensione.
Kjo deklaratë vjen në një moment kur roli i opinionistëve në “Big Brother VIP Albania” vazhdon të jetë shpesh në qendër të diskutimeve në publik dhe rrjetet sociale, duke ndikuar drejtpërdrejt në perceptimin e spektaklit.
Ndërkohë, vëmendja tashmë është përqendruar te Prime-i i së martës, ku pritet të zgjidhet finalistja e parë e këtij edicioni, mes Selin dhe Brikenës, një moment kyç që pritet të ndezë edhe më shumë garën.